Kyu ho raha hai

Maazi mai jo na hua, kyu ho raha hai               (past)
Mera maazi mujh se door ho raha hai

Main is dunya ka akhri shakhs to nahi              (last, person)
Zikr mera phir har su kyu ho raha hai               (discussion/mention, everywhere)

Ghadi se pehle koyi waqt ka alim hoga            (time, expert)
phir waqt kyu ghadi mai qaid ho raha hai 

Dozakh ki aag rulati nahi hai mujhe                (hell)
Jannat mai wo hooro ke samne ro raha hai     (heaven, fairies)

Tu parinda, teri khaslat oonchi parwaz             (bird, habit, flight)
Mamla darasal yahan se sangeen ho raha hai   (actually, intense) 

Saath mai ek pal hum jaage thay kabhi
Woh pal aaj bhi wahi khada so raha hai

Qais ne laila ka ek mandir tameer kiya             (Romeo, Juliet, construct)
Ab parastish karne ka iraada nahi ho raha hai  (worship)

Bahut sari Rait mutthi se nikal gayi hai
Shehroz ab Zindagi se mutassir ho raha hai     (impress)

Rubaru

Tehreer ke aghaaz mai, afsana mukammal ho gaya, (Writing, beginning)
Jo alag hua to panap gaya, jo lipat gaya to bikhar gaya

Us ainay ko dekh ke ek aina bana liya,
Aks dikh saka tabhi, jab mujhe se rubaru mai ho gaya

In majlison mai aansoo-on ka silsila bana raha, (public mourning)
Qissa-e- majlis bayan kiya, to khuda masroof ho gaya (busy)

Tohmat-e-sifar paishani ki lakiron mai bandh gayi, (allegation, zero)
Yeh safar sifar se shuru hua, ilzaam-e-safar ho gaya

Tehzeeb na sikha aye iblees, hazar sajde humne bhi kiye (manners, satan)
bas ek sajda na kiya aur tu begaana ho gaya (stranger)

Woh raaz humne jana, khud se poshida kar liya, (to hide/conceal)
Jo raaz sab ne jana, woh mera raaz ho gaya

Ek to woh sharab thi, kuch aadat Shehroz kharab thi,
Arq-e-Husn zaban ko diya to munkir faizaan ho gaya (sap/nector, disbeliever, beneficent)

Maqaam

Tere pehloo main ishq ka woh maqaam paa liya hai
mere har dard ko teri muskurahaton ne chhupa liya hai

judai raat ke siyah kagzon main dafan ho gayi hai
andheron ki roshnni main saahil ko paa liya hai

tujh se milnay ki khwahish thee zindagi jeenay ka sabab
Aaj aawaz jo suni to maut main sukoon paa liya hai

ghamon ko dil se lagakar ronay ka kya faida
kharay samandar se apni pyas ko bujha liya hai

jaam chakh kar to sab hee behak jaatay hain
main-khanay se guzar kar nasha honay ka raaz paaliya hai

kal jo kamzor thai to kahin gum thai, shehroz
garam hawaon ne aaj apna aaqa bana liya hai

Ban Gaya

Mujh se juda hokar tu mera hissa ban gaya
Jazbaton ki qabr main gharq (engraved) ek qissa ban gaya

Adhoori sansain, berang shafaq (dusk), nam (wet) palkain
Paishani (forehead) pe shikan, laraztay lab (shivering lips), hasb-e-mamool (daily routine) ban gaya

Qafla na bana, manzilain na mileen, raasta kho gaya
Waqt-e-Taameer ka shor ajab sannata ban gaya

Tera Taj Mahal mere ashiyane se bahut ooncha hai
Yahan zindagi thi, woh khoobsurat maqbara ban gaya

Maykhanay (bar) main kabhi may (sharab) ko na chua
May ko labon se jo lagaya to main (me) maykhana ban gaya

Nafs (desires) ka qatl karke soya tha kal
Mera mehboob mere nafs ka qatil ban gaya

Ashkon (tears) ke sailaab main Shehroz kinaray ko chala
Kamzor kinara mere doobne ka sabab (reason) ban gaya

Munasib Na Hoga

Dagha par teri aetraz na karoon, Munasib Na Hoga
Tu ehtraam na kare meri wafa ka, Munasib Na Hoga (respect)

Ek nayi sunsaan sadak dikhti hai mujhko
Manzil ka ishaara phir main karoon, Munasib Na Hoga

Dil-o-Dimaagh ka tawazzun bigadna mehaz ittefaq nahi hai (balance)
Jibraeel ban kar paigham sunaoon, Munasib Na Hoga (Gabriel-the angel- who brings verdict of god)

Zindagi ki jung ko mar kar jisne jeeta, humne nahi dekha
Qabr se gar woh phir khada ho jaye, Munasib Na Hoga

Habab ne umr-e-chaar din muqarrar hai payi (bubble, destined)
Ek roz aur jo badh jaye, Munasib Na Hoga

Shajar se takrakar aandhiyan wapas ho chaleen (Tree)
Sookhi pattiyan na tootkar kar jhadeen, Munasib Na Hoga

Mujh ko yaqeen ho chala ke main azeem hogaya (Great)
Kafan jo apna rangeen silwaoon, Munasib Na Hoga

Fitrat-e-insaan ko samjhne ki chahat tark ho chali (mizaaj/attitude/behavior, give up)
Kaafir se ummeed-e-Jihaad ho 'shehroz', Munasib Na Hoga (Non-believer of god, Fight for god )

Main Chala

uske kandhon par safar-e-akhri ko chala, (the last journey)
ek jahnnum ne azad kiya, doosray ko chala (hell)

kisine dekha hai tujhko samandar ke paar,
kaghaz ki kashti banakar tujhse milne ko chala (boat)

andhero par bebak hukumat thi uski,
yakbayak wo roshni ki simt ko chala (suddenly, towards)

jiska akheeda sookhay pattay sa toot gaya, (belief)
woh sard hawaon main diya jalanay ko chala

saakhi ki ankhon main ajab kashish si hai, (female bartender, attaraction)
Maikhanay ki soo shehroz doobnay ko chala (in the direction of bar)